«Алтын Орда» трилогиясы — Ілияс Есенберлиннің ерекше назар аударатын кесек туындысы, тарихымыздың түп негізін әріден көрсететін елеулі шығарма.
Трилогияның бірінші кітабында Алтын Орданың дағдарыс кезеңдері суреттелсе, екінші кітабында Ақ Орда, Алтын Орда төңірегіндегі оқиғалар әңгімеленеді. Моңғол билеушілері қазақ руларын ұлыстарға бөлгеннен кейін, Дәшті Қыпшақта қазақ елі деген жаңа ұғым қалыптасқан. Трилогияның үшінші кітабы Алтын Орда билік еткен өңірдегі қазақ жерінде өткен ең басты оқиғаларды баяндайды: Тоқтамыстың Алтын Орда тағына отыруы, Тоқтамыс пен Ақсақ Темір әскерлерінің айқасы, Едігенің жорықтары сияқты оқиғалар бірінен кейін бірі жалғасып отырады.
Кітап көпшілік оқырман қауымға арналған.

Керқұла атты Кендебай, Таусоғар мен Көлтауы- сарды жолдас еткен Ер Төстік, алтын сақасын іздеген бала, Ай астындағы Айбарша сұлу мен Күн астындағы Күнікей қыз – халық ертегілерінің қаһармандары барша мұратына жетіп, баланың қиялына қанат бітіреді. Ертегінің кез келген кейіпкері – ақылды тасбақа мен қоян, қарға мен кірпі, тіпті кішкентай құмырсқаның өзі мейірімділікке, ізгілікке баулиды. 

Бұл кітапқа қазақ әдебиетінің аса көрнекті өкілі, көркем сөздің хас шебері Ілияс Жансүгіровтің романтикалық сарында шалқыған шабытпен, поэзиялық құдіретті қуатпен жазылған ең таңдаулы поэмалары енді. «Қазақ поэзиясының Құлагері» атанған дүлдүл ақынның «Күй», «Күйші» және «Құлагер» поэмалары қазақ поэзиясын өзгеше үлгілермен байытты. Жинаққа енген жыр-дастандарында еркіндік пен құлдық, махаббат пен зұлымдық, өлім мен өмір, пәни тіршілік пен мәңгілік өнер арасындағы күрес тақырыбы суреттеледі. Ақынның сюжетті жырлары өмір шындығының қат-қабат шытырман күйлерін тереңдей барлайтын ойшылдыққа құрылған.
Кітап көпшілік оқырманға арналған.

Сәбит Мұқанов қазақтың ХІХ ғасырдағы ойшыл-ғалымы Шоқан Уәлихановтың өмірі мен шығармашылығын ұзақ жылдар бойы терең зерттеді. Романды жазу барысында Қытайдың Шыңжан өлкесіне барып, Шоқан басып өткен елді мекендерді аралап, бастан кешірген оқиғаларына терең үңіліп, зерттеу жасады. Омбы мен Ленинград қаласындағы мұрағаттар мен кітапханаларды ақтарып, Шоқан өміріне қатысты материалдар жинады. «Тұманды дәуірде» өмір сүріп, өз халқының алдында «болу не болмау» мәселесінің тұрғанын бүкіл болмысымен, жан дүниесімен ұғынған Шоқан Уәлиханов ұрпақтары үшін жарық жұлдыз екенін Сәбит Мұқанов тағы бір дәлелдеді. Ол өз халқын жан-тәнімен сүйген Шоқанды «тамаша ойшыл» ретінде суреттейді.
Жазушының Шоқан туралы жазған еңбегінің екі кітабы ғана аяқталған. Өкінішке қарай, Шоқанның өнегелі өмірінің ғұмырнамасына айналған еңбек аяқталмаған күйде қалды.
Кітап көпшілік оқырманға арналған.

Абайдың қара сөздері — ұлы ақынның сөз өнеріндегі көркемдік қуатын, философиядағы даналық дүниетанымын, өмірде түйген көзқарасын саралап көрсететін классикалық стильде жазылған прозалық шығармасы, көркем әдебиеттегі ерекше қадамы, жаңашыл бастамасы. Қара сөз қалың оқырманды ізгілікке шақырар, адамгершілікке баулып, санаға сілкініс, ойға қозғау салатын, жүрекке жігер беретін сипатымен құнды, ақынның сыншылдық, ойшылдық, адамгершілік мәселелеріне арналған, ой еркіндігімен жеткізген өсиет, нақылының, ойтолғауының жиынтығы.

Барлығы 45 сөзден тұратын ерекше туынды болашаққа бағыт-бағдар сілтейтін бағдаршам ретінде әр адамның айнасы болып, ғұмырлық ұстанымын қалыптастырары сөзсіз.

Ұлы ақынның қара сөздері жинақталған бұл кітап барша оқырманға арналған.

Көшпенділер — Ілияс Есенберлиннің «Алмас қылыш», «Жан-
талас», «Қаһар» атты үш кітаптан тұратын тарихи эпопеясы. Бұл
шығарма — қазақ сөз өнерінің әлемдік нұсқасына қосылған тарихты
көркемдік пайымдаудың үздік үлгілерінің бірі.
«Жанталас» — Абылай кезеңіндегі Қазақ хандығының Жоңғар,
Ресей патшалығы, Қытай елдері тарапынан қыспаққа алынып, ел
басына қысылтаяң күн туған қиын кезеңді әңгімелейді. Бұл кітап та-
рихта «Ақтабан шұбырынды, алқакөл сұлама» деген атаумен қалған
ұлы қырғын — жоңғар шапқыншылығын сипаттаудан басталады.
Халықтың осы азаттық жолындағы күресінде алғаш батырлығымен
көзге түсіп, кейіннен қалың қазаққа хан болған Абылайдың ғұмыры ел
тағдырымен бірге баяндалады. Сонымен қатар қазақ халқының жоңғар
басқыншыларына қарсы XVIII ғасырдағы азаттық күресінің шешуші
кезеңдері, қазақ елінің саяси-әлеуметтік ахуалы, ішкі қайшылықтары
мен сыртқы жаулары туралы тарихи мағлұмат берілген.

Қазақ әдебиетінің классигі Сәбит Мұқановтың «Мөлдір махаббат» романы Кеңес үкіметінің қылышынан қан тамып тұрған кезеңде Бүркіт пен Бәтес есімді екі жастың арасында бүр жарған кіршіксіз сезімді бейнелейді. Туынды алғаш рет 1935 жылы «Адасқандар» деген атаумен жарық көрген. Кейіннен жазушының өзгерту-толықтыруларымен 1959 жылы «Мөлдір махаббат» деген атаумен оқырманға қайта жол тартты.
Романдағы Бүркіт пен Бәтес арасындағы шоқтығы биік махаббат «Сүйген жар» бөлімінде баяндалады. Екі жастың арасындағы махаббат оқиғасы, өз махаббаттарын қорғау жолындағы кедергілер оқырманды бірден қызықтырып, баурап алады.
Кітап көпшілік оқырман қауымға арналған.